Cearta Athbhreithnithe agus Achomhairc
San Acht um Shaoráil Faisnéise 2014, leagtar amach na sásraí achomhairc atá ann sa chás go ndiúltaítear d’iarratas, chomh maith leis na sásraí achomhairc a bhaineann le cur siar rochtana, táillí, agus formáid na rochtana.
Tá sonraí na sásraí sin le fáil sa chuid seo a leanas.
Athbhreithniú Inmheánach
Is féidir leat a iarraidh go ndéanfaí Athbhreithniú Inmheánach ar an gcéad chinneadh sna cásanna seo a leanas:
- tá tú míshásta lena raibh sa chéad fhreagra a fuair tú, mar shampla, diúltú faisnéise, formáid na faisnéise, táillí etc., nó
- ní bhfuair tú freagra laistigh de cheithre seachtaine ó fuarthas an chéad iarratas. Meastar gur diúltú é sin, agus mar sin féadfaidh tú dul ar aghaidh chuig próiseas an Athbhreithnithe Inmheánaigh.
Is Oifigeach ag leibhéal níos sóisearaí a chuireann an tAthbhreithniú Inmheánach i gcrích. Ba cheart iarratais ar Athbhreithnithe Inmheánacha, chomh maith leis an taille lena mbaineann (sonraí thíos), a sheoladh laistigh de cheithre seachtaine ón gcéad chinneadh, chuig:
An tUasal John Condon
Stiúrthóir Seirbhísí
Comhairle Contae Mhaigh Eo
Áras an Chontae
Caisleán an Bharraigh
Contae Mhaigh Eo
F23 WF90
Ríomhphost: foi@mayococo.ie
Fón: 094 9064000
Bíonn ár n-oifigí ar oscailt ó 9.00 am go dtí 1.00 pm agus ó 2.00 go 5.00 pm, Luan go hAoine. Ní bhíonn siad ar oscailt ar laethanta saoire poiblí.
Is gá dúinn an t-athbhreithniú a chríochnú laistigh de thrí seachtaine. De ghnáth, is gá athbhreithniú inmheánach a bheith críochnaithe sula gcuirfear aon achomharc ar aghaidh chuig an gCoimisinéir Faisnéise.
- Tá gnáth-tháille €30 le híoc agus le cur isteach le gach iarratas ar Athbhreithniú Inmheánach (seachas i gcás athbhreithnithe a bhaineann le faisnéis phearsanta).
- Tá táille laghdaithe €10 le híoc má tá cárta leighis agat nó má tá tú cleithiúnach ar dhuine a bhfuil cárta leighis aige nó aici (seachas i gcás athbhreithnithe a bhaineann le faisnéis phearsanta).
Má bhaineann d’athbhreithniú go sonrach le cinneadh uainne táille cuardaigh agus aisghabhála nó táille cóipeála a ghearradh, ní bhainfidh aon táille le d’iarratas.
Athbhreithniú ag an gCoimisnéir Faisnéise
Is féidir leat athbhreithniú neamhspleách ón gCoimisinéir Faisnéise a iarraidh sna cásanna seo a leanas:
- tá tú míshásta leis an gcinneadh ar an Athbhreithniú Inmheánach, nó
- níl freagra faighte agat laistigh de thrí seachtaine ó fuarthas d’iarratas ar Athbhreithniú Inmheánach. Meastar gur diúltú é sin, agus féadfaidh tú achomharc a dhéanamh chuig an gCoimisinéir dá dheasca.
Ba cheart duit iarratas i scríbhinn, a mbeidh an táille chuí ag gabháil leis, a sheoladh chuig an gCoimisinéir Faisnéise:
Oifig an Choimisinéara Faisnéise
6 Ardán Phort an Iarla
Baile Átha Cliath 2
D02 W773
Fón: 01 639 5689
Ríomhphost: info@oic.ie
Suíomh Gréasáin: www.oic.ie
Bíonn Oifig an Choimisinéara Faisnéise ar oscailt ó 9.15 am go 5.00 pm, Luan go hAoine, seachas ar laethanta saoire poiblí.
- Tá gnáth-tháille €50 le híoc agus le cur isteach le gach iarratas ar achomharc (seachas i gcás achomhairc a bhaineann le faisnéis phearsanta).
- Tá táille laghdaithe €15 le híoc má tá cárta leighis agat nó má tá tú cleithiúnach ar dhuine a bhfuil cárta leighis aige nó aici (seachas i gcás achomhairc a bhaineann le faisnéis phearsanta).
Má bhaineann d’achomharc go sonrach le cinneadh ó Chomhairle Contae Mhaigh Eo táille cuardaigh agus aisghabhála nó táille cóipeála a ghearradh, ní bhainfidh aon táille le d’iarratas ar achomharc.